Facebook
Instagram
YouTube
WhatsApp
Os días 21 e 22 de decembro, a Praza do Concello do Barco de Valdeorras converterase nun punto de encontro para celebrar o espírito do Nadal co tradicional Mercado de Nadal. Nesta edición, doce produtores de alimentación, dezanove artesáns e catro asociacións ofrecerán os seus produtos e detalles para estas datas especiais. Ademais, o evento contará con numerosas actividades para todas as idades.
A inauguración do mercado terá lugar o sábado 21 ás 11.30 horas. Unha das propostas máis destacadas deste ano será o showcooking dun menú de Nadal, dirixido por Belén Castro de Vallelongo, que se celebrará o sábado ás 12.00 horas no propio recinto do mercado. Aqueles interesados poderán inscribirse previamente para non perder esta demostración culinaria.
O domingo 22, os asistentes poderán gozar dunha cata de Nadal ás 12.00 horas, onde se degustarán produtos do mercado maridados con viños de Valdeorras, mosto e licores. A cata estará guiada pola enóloga Cecilia Fernández e terá lugar na Sala de Exposicións de Abanca na Praza do Príncipe.
Outro momento especial será o recital de panxoliñas, programado para as 18.00 horas do domingo, no que participarán alumnos dos colexios Condesa de Fenosa, Divina Pastora e Ramón Otero Pedraio. Para poñer o toque doce á xornada, os asistentes poderán participar nunha chocolatada gratuíta ás 19.00 horas no recinto do mercado.
Como broche final, realizarase un sorteo dunha cesta de Nadal con produtos das casetas do mercado ás 19.30 horas, entre aqueles que fagan compras ao longo da fin de semana.
Programa do Mercado de Nadal do Barco de Valdeorras
